أعمدة صحفيةالرياضية

قزاز ورذاذ

 

محمد الطيب الأمين

شيل الخدرة والماء وخت منتخبنا والوجه الحسن !!

* سلفاً عرفنا عناصر الجمال تلاتة : (الخدرة والماء والوجه الحسن).

* ومننا نحن بنضيف ليها عنصر رابع لتصبح (الخدرة والماء والوجه الحسن والمنتخب الوطني).

* المنتخب الوطني حالياً أصبح الناطق الرسمي بإسم الجمال.

* زيو وزي إسحاق الحلنقي.

* الجمال ممكن يكون في (الشكل).

* وممكن يكون في (الطبع).

* وممكن يكون في (اللسان).

* ويكون في (القوام).

* ويكون في (المنتخب).

* المنتخب في ظروفنا الحالية دي هو يمثل كل عناصر الجمال السوداني.

* هو (الخدرة) .. واصلا البلد يابسة.

* هو (الماء) .. لأنو أصلا كده كده (الموية قاطعة السنة كلها).

* الموية في الخرطوم بنشوفها جارية (نيلين) كل نيل أطول من التاني ولما نجي للحنفية بنلقاها قاطعة.

* نعاين للموية جارية والحنفية تشخر.

* أكتر (مواسير) في العالم مرتاحة هي مواسير السودان.

* شغالة تشخر أكتر من إنها تجيب موية.

* خلت شغالة الأساسي وبقت تشخر.

* والله صحي.

* عشان كده منتخبنا هو (الخدرة وهو الماء).

* وهو (الوجه الحسن) كذلك.

* لأنو الوجه الحسن حالياً بقى (وش فاسخ وجالخ).

* كل العناصر الجمالية تتوفر في صقور الجديان.

* ولا أظن أن هنالك لوحة أجمل من أن ترى (محمد عبد الرحمن وسيف تيري ويس حامد) في المقدمة الهجومية.

* التلاتة ديل ممكن يعملوا (مصران عصبي) لأي منتخب في أفريقيا.

* هجوم زي (مطر الليل) ماشاء الله تبارك الله.

* هيبة وشخصية.

* حضور وكاريزما.

* سرعة وقوة.

* مهارة وشطارة.

* أعتقد أن (سر) منتخبنا الوطني يكمن في خط هجومه وفي جهازه الفني.

* صحيح كرة القدم بلعبوها (١١) ولكن يبقى هجوم منتخبنا هو أقوى خطوط الفريق.

* لما يكون عندك زي الغربال وتيري ويس يجب أن لا تخاف.

* لما يكون عندك زي أطهر الطاهر وشيبوب يجب أن تفرح.

* لما يكون عندك زي أبو عشرين وارنق وأمير كمال عليك أن تطمن.

* لما يكون عندك زي فارس وأبو عاقلة والشغيل يجب أن تنوم قفا.

* لما يكون عندك زي السموأل ومعاذ القوز ومحمد المصطفى ووليد الشعلة والجزولي والتاج يعقوب وكل المجموعة.

* لما يكون عندك زي ديل فأنت تملك الكثير.

* لما يكون عندك شداد وبرقو وفيلود وخالد بخيت فأعلم أن الوطن بخير.

* ولأن ذلك كذلك فإن العشم ما انقطع.

* والأمل في هذا الجيل كبير.

* هذا الشعب الذي اتبرمج على الأحزان يتعلق الآن بضحكة اسمها صقور الجديان.

* بسمة في زمن كلو دموع.

* بسلم في وقت الجراح.

* موية باردة في جوف مولع من حرارة الظروف وغلاء المعيشة.

* هي ٩٠ دقيقة بحسابات الزمن لا تعني شئ ولكن بحسابات الكسب تعني الكثير.

* الفوز يكتب تاريخ جديد لمنتخبنا.

* الفوز يعني أن السودان مع كبار العرب في النهائيات بالدوحة.

* نحترم المنتخب الليبي الشقيق ونقدر طموحاتهم.

* ولو هم منتخب ثائر فنحن منتخب الثوار.

* لو هم شالوا القذافي فنحن شلنا البشير.

* ما فيش حد أحسن من حد.

* نجتهد ونركز ومن بعد ذلك الفيهو طيب بنشم.

* و.. و..

* والزول بباهي وبفتخر بالعندو.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق