أعمدة صحفية

رد فعل

 

عماد ابوشامة

تعليقات علي الاخبار

بيروت تستفسر الخرطوم عن الجنسية السودانية لاشهر تاجر مخدرات.

طبيعي ان يتحول الاستفسار الي نزلاء سجن كوبر منذ عامين بعد جعلوا الجنسية في عهدهم تباع وتشترى واصبح اغلبهم لبناني بلا تظليل علي راي نكتة السوداني الذي قال انه :(لبناني مظلل).

الدولار يواصل الصعود ويقترب من الخمسمائة.

جنيهنا يا كافي البلى ما عندو حيل علي سباق النفس الطويل بعد قلنا خلاص الدولار جاب اخرو معانا .. طبعا شي طبيعي بعد ان عاد السيد وزير المالية دكتور جبريل ابراهيم الكنا متوسمين فيهو الخير عاد الي سياسة رفع الدعم من جديد كلما ازنقت المالية في قرشين.

السودان ينتقد اثيوبيا ويتمسك بسيادته علي بني شنقول.

حقنا طبعا .. طالما الموضوع بقي دواس في الفشقة القلعناها بعين حمراء .. وبرضو حقنا في حلايب وشلتين بكدة بس ببقي الشعار والمبدأ حقيقيين وعشان برضو شكوكنا حول من وراء حربنا مع الاحباش ما تكون في محلها.

السعودية تعيد شحنة جديدة من الماشية السودانية.

الغريبة قبل ايام قالوا مافي باخرة سودانية تحمل مواشي حاترجع تاني ..شكلو وزير الثروة الحيوانية سمع ليهو تصريح من التصريحات الدبلوماسية التي تطلق من حين لاخر وعلي طول ملا الباخرة (حفشا وسوء كيلة) قايل البلد مطلوقة هناك.

حمدوك: الدين الاسلامي محمي بالارث الصوفي ولاخوف عليه.

الدين الاسلامي محمي بدون اي ارث في الدنيا .. وهذا الحمدوك لم يسمع الاية .. (الم تر كيف فعل ربك باصحاب الفيل).. اصحاب الفييييييل واي اصحاب في الدنيا يتامرون عليه.

حسن مكي: علي شباب الاسلاميين اجراء المراجعات وليس البكاء والحسرة.

للاسف يا بروفيسور حسن مكي حتي الثوار الآن يبكون ويتحسرون ماعارفين المشكلة وين.

حميدتي يوجه الدعم السريع بعدم الاقتراب من معاقل عبدالواحد.

طمع وللا خوف؟.. اي كان انتو حركات مسلحة في بعضيكم وبتفهموا بعض وعندكم مفاوضات تحت الطربيزة مع بعض.

مجلس الشركاء : تصريحات جبريل حول قانون الاحوال الشخصية لا يمثلنا.

خلي بس يمثلكم في الزيادات البعمل فيها صباح ومساء دي .. عالم ما يرتفع صوتها الا في قضية لاتهم معاش المواطن.

حزب الامة القومي يدعو الشيوعي للعودة لمنصة التاسيس.

الشيوعي دا زول شارع بس اي منصات وحركات زي دي مابتنفع معاهو.

اثيوبيا تصف الملء الثاني لسد النهضة بالقيامة.

حقيقي الملء الثاني لسد النهضة بالطريقة التي ترغب فيها اثيوبيا يعني قيامة السودان قامت.

لجان المقاومة تعلن عن مليونية 30 يونيو لاسقاط الانقاذ الثانية.

علي راي خالتي تاجوج رحمة الله تغشاها: (حلللليل ابوي داك).. حليل ابوي وحليل امي وحليل خالتي تاجوج ذاتها.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق